Vuçiq të dielën në Gjermani për takim te Merkeli, Kurti shkon dy ditë pas tij

Presidenti i Serbisë, Aleksandër Vuçiq, të dielën do të udhëtojë për në kryeqytetin gjerman, aty ku do të takohet me kancelaren Angela Merkel. Dy ditë më vonë në Gjermani do të shkojë edhe kryeministri i Kosovës, Albin Kurti

Kështu të paktën ka deklaruar ministri i Jashtëm serb, Ivica Daçiq, që ka deklaruar gjithashtu se të mërkurën se Serbia do ta vazhdojë fushatën e çnjohjeve të Kosovës, “deri në mbërritjen e një marrëveshjeje apo kompromisi”.

Kryediplomati i Serbisë, në një prononcim për televizionin serb “Hepi” ka thënë se Beogradi do të mundë ta pranonte ndonjë moratorium apo periudhë kalimtare, gjatë së cilës as Serbia nuk do të “punonte drejt tërheqjes së njohjeve dhe as Kosova nuk do të kandidonte në organizatat ndërkombëtare”, raporton Fonet.